Ἀχαρνῆς

Trochees 1

Χορός

204τῇδε πᾶς ἕπου δίωκε καὶ τὸν ἄνδρα πυνθάνου

205τῶν ὁδοιπόρων ἁπάντων· τῇ πόλει γὰρ ἄξιον

206ξυλλαβεῖν τὸν ἄνδρα τοῦτον. ἀλλά μοι μηνύσατε,

207εἴ τις οἶδʼ ὅποι τέτραπται γῆς ὁ τὰς σπονδὰς φέρων.

Strophe 1

Χορός

208ἐκπέφευγʼ, οἴχεται φροῦδος. οἴμοι τάλας

210τῶν ἐτῶν τῶν ἐμῶν·

211οὐκ ἂν ἐπʼ ἐμῆς γε νεότητος, ὅτʼ ἐγὼ φέρων ἀνθράκων φορτίον

215ἠκολούθουν Φαΰλλῳ τρέχων, ὧδε φαύλως ἂν ὁ

216σπονδοφόρος οὗτος ὑπʼ ἐμοῦ τότε διωκόμενος

217ἐξέφυγεν οὐδʼ ἂν ἐλαφρῶς ἂν ἀπεπλίξατο.

Trochees 3

Χορός

219νῦν δʼ ἐπειδὴ στερρὸν ἤδη τοὐμὸν ἀντικνήμιον,

220καὶ παλαιῷ Λακρατείδῃ τὸ σκέλος βαρύνεται,

221οἴχεται. διωκτέος δέ· μὴ γὰρ ἐγχάνῃ ποτὲ

222μηδέ περ γέροντας ὄντας ἐκφυγὼν Ἀχαρνέας.

Antistrophe 1

Χορός

225ὅστις ὦ Ζεῦ πάτερ καὶ θεοὶ τοῖσιν ἐχθροῖσιν ἐσπείσατο,

226οἷσι παρʼ ἐμοῦ πόλεμος ἐχθοδοπὸς αὔξεται τῶν ἐμῶν χωρίων·

230κοὐκ ἀνήσω πρὶν ἂν σχοῖνος αὐτοῖσιν ἀντεμπαγῶ

231ὀξὺς ὀδυνηρὸς ἐπίκωπος, ἵνα

232μήποτε πατῶσιν ἔτι τὰς ἐμὰς ἀμπέλους.

Trochees 5

Χορός

234ἀλλὰ δεῖ ζητεῖν τὸν ἄνδρα καὶ βλέπειν βαλληνάδε

235καὶ διώκειν γῆν πρὸ γῆς, ἕως ἂν εὑρεθῇ ποτέ·

236ὡς ἐγὼ βάλλων ἐκεῖνον οὐκ ἂν ἐμπλῄμην λίθοις.

Δικαιόπολις

237εὐφημεῖτε, εὐφημεῖτε.

Χορός

238σῖγα πᾶς. ἠκούσατʼ ἄνδρες ἆρα τῆς εὐφημίας;

239οὗτος αὐτός ἐστιν ὃν ζητοῦμεν. ἀλλὰ δεῦρο πᾶς

240ἐκποδών· θύσων γὰρ ἁνὴρ ὡς ἔοικʼ ἐξέρχεται.

Lyric 1

Δικαιόπολις

263Φαλῆς ἑταῖρε Βακχίου

264ξύγκωμε νυκτοπεριπλάνητε

265μοιχὲ παιδεραστά,

266ἕκτῳ σʼ ἔτει προσεῖπον ἐς

267τὸν δῆμον ἐλθὼν ἄσμενος,

268σπονδὰς ποιησάμενος ἐμαυτῷ,

269πραγμάτων τε καὶ μαχῶν

270καὶ Λαμάχων ἀπαλλαγείς.

271πολλῷ γάρ ἐσθʼ ἥδιον, ὦ Φαλῆς Φαλῆς,

272κλέπτουσαν εὑρόνθʼ ὡρικὴν ὑληφόρον

273τὴν Στρυμοδώρου Θρᾷτταν ἐκ τοῦ Φελλέως

274μέσην λαβόντʼ ἄραντα καταβαλόντα

275καταγιγαρτίσʼ ὦ

276Φαλῆς Φαλῆς.

277ἐὰν μεθʼ ἡμῶν ξυμπίῃς, ἐκ κραιπάλης

278ἕωθεν εἰρήνης ῥοφήσει τρύβλιον·

279ἡ δʼ ἀσπὶς ἐν τῷ φεψάλῳ κρεμήσεται.

Lyric 1

Χορός

280οὗτος αὐτός ἐστιν, οὗτος.

281βάλλε βάλλε βάλλε βάλλε,

282παῖε παῖε τὸν μιαρόν.

283οὐ βαλεῖς; οὐ βαλεῖς;

Strophe 1

Δικαιόπολις

284Ἡράκλεις τουτὶ τί ἐστι; τὴν χύτραν συντρίψετε.

Χορός

285σὲ μὲν οὖν καταλεύσομεν ὦ μιαρὰ κεφαλή.

Δικαιόπολις

286ἀντὶ ποίας αἰτίας ὦχαρνέων γεραίτατοι;

Χορός

288τοῦτʼ ἐρωτᾷς; ἀναίσχυντος εἶ καὶ βδελυρὸς

290ὦ προδότα τῆς πατρίδος, ὅστις ἡμῶν μόνος

291σπεισάμενος εἶτα δύνασαι πρὸς ἔμʼ ἀποβλέπειν.

Δικαιόπολις

293ἀντὶ δʼ ὧν ἐσπεισάμην οὐκ ἴστε. μἀλλαʼ ἀκούσατε.

Χορός

295σοῦ γʼ ἀκούσωμεν; ἀπολεῖ· κατά σε χώσομεν τοῖς λίθοις.

Δικαιόπολις

296μηδαμῶς πρὶν ἄν γʼ ἀκούσητʼ· ἀλλʼ ἀνάσχεσθʼ ὦγαθοί.

Χορός

298οὐκ ἀνασχήσομαι· μηδὲ λέγε μοι σὺ λόγον·

300ὡς μεμίσηκά σε Κλέωνος ἔτι μᾶλλον, ὃν ἐγὼ

301κατατεμῶ ποθʼ ἱππεῦσι καττύματα.

Trochees 3

Χορός

302σοῦ δʼ ἐγὼ λόγους λέγοντος οὐκ ἀκούσομαι μακρούς,

303ὅστις ἐσπείσω Λάκωσιν, ἀλλὰ τιμωρήσομαι.

Δικαιόπολις

305ὦγαθοὶ τοὺς μὲν Λάκωνας ἐκποδὼν ἐάσατε,

306τῶν δʼ ἐμῶν σπονδῶν ἀκούσατʼ, εἰ καλῶς ἐσπεισάμην.

Χορός

307πῶς δέ γʼ ἂν καλῶς λέγοις ἄν, εἴπερ ἐσπείσω γʼ ἅπαξ

308οἷσιν οὔτε βωμὸς οὔτε πίστις οὔθʼ ὅρκος μένει;

Δικαιόπολις

309οἶδʼ ἐγὼ καὶ τοὺς Λάκωνας, οἷς ἄγαν ἐγκείμεθα,

310οὐχ ἁπάντων ὄντας ἡμῖν αἰτίους τῶν πραγμάτων.

Χορός

311οὐχ ἁπάντων ὦ πανοῦργε; ταῦτα δὴ τολμᾷς λέγειν

312ἐμφανῶς ἤδη πρὸς ἡμᾶς; εἶτʼ ἐγώ σου φείσομαι;

Δικαιόπολις

313οὐχ ἁπάντων, οὐχ ἁπάντων· ἀλλʼ ἐγὼ λέγων ὁδὶ

314πόλλʼ ἂν ἀποφήναιμʼ ἐκείνους ἔσθʼ ἃ κἀδικουμένους.

Χορός

315τοῦτο τοὔπος δεινὸν ἤδη καὶ ταραξικάρδιον,

316εἰ σὺ τολμήσεις ὑπὲρ τῶν πολεμίων ἡμῖν λέγειν.

Δικαιόπολις

317κἄν γε μὴ λέγω δίκαια μηδὲ τῷ πλήθει δοκῶ,

318ὑπὲρ ἐπιξήνου ʼθελήσω τὴν κεφαλὴν ἔχων λέγειν.

Χορός

319εἰπέ μοι τί φειδόμεσθα τῶν λίθων ὦ δημόται

320μὴ οὐ καταξαίνειν τὸν ἄνδρα τοῦτον ἐς φοινικίδα;

Δικαιόπολις

321οἷον αὖ μέλας τις ὑμῖν θυμάλωψ ἐπέζεσεν.

322οὐκ ἀκούσεσθʼ; οὐκ ἀκούσεσθʼ ἐτεὸν ὦχαρνηίδαι;

Χορός

323οὐκ ἀκουσόμεσθα δῆτα.

Δικαιόπολις

323bδεινά τἄρα πείσομαι.

Χορός

324ἐξολοίμην, ἢν ἀκούσω.

Δικαιόπολις

324bμηδαμῶς ὦχαρνικοί.

Χορός

325ὡς τεθνήξων ἴσθι νυνί.

Δικαιόπολις

325bδήξομἄρʼ ὑμᾶς ἐγώ.

326ἀνταποκτενῶ γὰρ ὑμῶν τῶν φίλων τοὺς φιλτάτους·

327ὡς ἔχω γʼ ὑμῶν ὁμήρους, οὓς ἀποσφάξω λαβών.

Χορός

328εἰπέ μοι, τί τοῦτʼ ἀπειλεῖ τοὔπος ἄνδρες δημόται

329τοῖς Ἀχαρνικοῖσιν ἡμῖν; μῶν ἔχει του παιδίον

330τῶν παρόντων ἔνδον εἵρξας; ἢ ʼπὶ τῷ θρασύνεται;

Δικαιόπολις

331βάλλετʼ εἰ βούλεσθʼ. ἐγὼ γὰρ τουτονὶ διαφθερῶ.

332εἴσομαι δʼ ὑμῶν τάχʼ ὅστις ἀνθράκων τι κήδεται.

Χορός

333ὡς ἀπωλόμεσθʼ. ὁ λάρκος δημότης ὅδʼ ἔστʼ ἐμός.

334ἀλλὰ μὴ δράσῃς ὃ μέλλεις· μηδαμῶς ὦ μηδαμῶς.

Antistrophe 1

Δικαιόπολις

335ὡς ἀποκτενῶ, κέκραχθʼ· ἐγὼ γὰρ οὐκ ἀκούσομαι.

Χορός

336ἀπολεῖς ἄρʼ ὁμήλικα τόνδε φιλανθρακέα;

Δικαιόπολις

337οὐδʼ ἐμοῦ λέγοντος ὑμεῖς ἀρτίως ἠκούσατε.

Χορός

338ἀλλὰ γὰρ νῦν λέγʼ, εἴ σοι δοκεῖ, τόν τε Λακεδαιμόνιον

339† αὐτὸν ὅτι τῷ † τρόπῳ σοὐστὶ φίλος·

340ὡς τόδε τὸ λαρκίδιον οὐ προδώσω ποτέ.

Δικαιόπολις

341τοὺς λίθους νύν μοι χαμᾶζε πρῶτον ἐξεράσατε.

Χορός

342οὑτοιί σοι χαμαί, καὶ σὺ κατάθου πάλιν τὸ ξίφος.

Δικαιόπολις

343ἀλλʼ ὅπως μὴ νʼ τοῖς τρίβωσιν ἐγκάθηνταί που λίθοι.

Χορός

344ἐκσέσεισται χαμᾶζʼ· οὐχ ὁρᾷς σειόμενον;

345ἀλλὰ μή μοι πρόφασιν, ἀλλὰ κατάθου τὸ βέλος.

346ὡς ὅδε γε σειστὸς ἅμα τῇ στροφῇ γίγνεται.

Strophe 1

Χορός

358τί οὖν οὐ λέγεις, ἐπίξηνον ἐξενεγκὼν θύραζʼ,

360ὅ τι ποτʼ ὦ σχέτλιε τὸ μέγα τοῦτʼ ἔχεις;

363πάνυ γὰρ ἔμεγε πόθος ὅ τι φρονεῖς ἔχει.

364ἀλλʼ ᾗπερ αὐτὸς τὴν δίκην διωρίσω,

365θεὶς δεῦρο τοὐπίξηνον ἐγχείρει λέγειν.

Iambics 2

Δικαιόπολις

366ἰδοὺ θεᾶσθε, τὸ μὲν ἐπίξηνον τοδί,

367ὁ δʼ ἀνὴρ ὁ λέξων οὑτοσὶ τυννουτοσί.

368ἀμέλει μὰ τὸν Δίʼ οὐκ ἐνασπιδώσομαι,

369λέξω δʼ ὑπὲρ Λακεδαιμονίων ἅ μοι δοκεῖ.

370καίτοι δέδοικα πολλά· τούς τε γὰρ τρόπους

371τοὺς τῶν ἀγροίκων οἶδα χαίροντας σφόδρα,

372ἐάν τις αὐτοὺς εὐλογῇ καὶ τὴν πόλιν

373ἀνὴρ ἀλαζὼν καὶ δίκαια κἄδικα·

374κἀνταῦθα λανθάνουσʼ ἀπεμπολώμενοι·

375τῶν τʼ αὖ γερόντων οἶδα τὰς ψυχὰς ὅτι

376οὐδὲν βλέπουσιν ἄλλο πλὴν ψηφηδακεῖν.

377αὐτός τʼ ἐμαυτὸν ὑπὸ Κλέωνος ἅπαθον

378ἐπίσταμαι διὰ τὴν πέρυσι κωμῳδίαν.

379εἰσελκύσας γάρ μʼ ἐς τὸ βουλευτήριον

380διέβαλλε καὶ ψευδῆ κατεγλώττιζέ μου

381κἀκυκλοβόρει κἄπλυνεν, ὥστʼ ὀλίγου πάνυ

382ἀπωλόμην μολυνοπραγμονούμενος.

383νῦν οὖν με πρῶτον πρὶν λέγειν ἐάσατε

384ἐνσκευάσασθαί μʼ οἷον ἀθλιώτατον.

Antistrophe 1

Χορός

385τί ταῦτα στρέφει τεχνάζεις τε καὶ πορίζεις τριβάς;

386λαβὲ δʼ ἐμοῦ γʼ ἓνεκα παρʼ Ἱερωνύμου

390σκοτοδασυπυκνότριχά τινʼ Ἄιδος κυνῆν·

391ἀλλʼ ἐξάνοιγε μηχανὰς τὰς Σισύφου,

392ὡς σκῆψιν ἁγὼν οὗτος οὐκ ἐσδέξεται.

Iambics 4

Δικαιόπολις

393ὥρα ʼστὶν ἤδη καρτερὰν ψυχὴν λαβεῖν,

394καί μοι βαδιστέʼ ἐστὶν ὡς Εὐριπίδην.

395παῖ παῖ.

Κηφισόφων

395bτίς οὗτος,

Δικαιόπολις

395cἔνδον ἔστʼ Εὐριπίδης;

Κηφισόφων

396οὐκ ἔνδον ἔνδον ἐστίν, εἰ γνώμην ἔχεις.

Δικαιόπολις

397πῶς ἔνδον εἶτʼ οὐκ ἔνδον;

Κηφισόφων

397bὀρθῶς ὦ γέρον.

398ὁ νοῦς μὲν ἔξω ξυλλέγων ἐπύλλια

399οὐκ ἔνδον, αὐτὸς δʼ ἔνδον ἀναβάδην ποιεῖ

400τραγῳδίαν.

Δικαιόπολις

400bὦ τρισμακάριʼ Εὐριπίδη,

401ὅθʼ ὁ δοῦλος οὑτωσὶ σαφῶς ἀπεκρίνατο.

402ἐκκάλεσον αὐτόν.

Κηφισόφων

402bἀλλʼ ἀδύνατον.

Δικαιόπολις

402cἀλλʼ ὅμως·

403οὐ γὰρ ἂν ἀπέλθοιμʼ, ἀλλὰ κόψω τὴν θύραν.

404Εὐριπίδη, Εὐριπίδιον,

405ὑπάκουσον, εἴπερ τώποτʼ ἀνθρώπων τινί·

406Δικαιόπολις καλεῖ σε Χολλῄδης, ἐγώ.

Εὐριπίδης

407ἀλλʼ οὐ σχολή.

Δικαιόπολις

408ἀλλʼ ἐκκυκλήθητʼ.

Εὐριπίδης

408bἀλλʼ ἀδύνατον.

Δικαιόπολις

408cἀλλʼ ὅμως.

Εὐριπίδης

409ἀλλʼ ἐκκυκλήσομαι· καταβαίνειν δʼ οὐ σχολή.

Δικαιόπολις

410Εὐριπίδη,

Εὐριπίδης

410bτί λέλακας;

Δικαιόπολις

410cἀναβάδην ποιεῖς,

411ἐξὸν καταβάδην; οὐκ ἐτὸς χωλοὺς ποιεῖς.

412ἀτὰρ τί τὰ ῥάκιʼ ἐκ τραγῳδίας ἔχεις,

413ἐσθῆτʼ ἐλεινήν; οὐκ ἐτὸς πτωχοὺς ποιεῖς.

414ἀλλʼ ἀντιβολῶ πρὸς τῶν γονάτων σʼ Εὐριπίδη,

415δός μοι ῥάκιόν τι τοῦ παλαιοῦ δράματος.

416δεῖ γάρ με λέξαι τῷ χορῷ ῥῆσιν μακράν·

417αὕτη δὲ θάνατον, ἢν κακῶς λέξω, φέρει.

Εὐριπίδης

418τὰ ποῖα τρύχη; μῶν ἐν οἷς Οἰνεὺς ὁδὶ

419ὁ δύσποτμος γεραιὸς ἠγωνίζετο;

Δικαιόπολις

420οὐκ Οἰνέως ἦν, ἀλλʼ ἔτʼ ἀθλιωτέρου.

Εὐριπίδης

421τὰ τοῦ τυφλοῦ Φοίνικος;

Δικαιόπολις

421bοὐ Φοίνικος, οὔ·

422ἀλλʼ ἕτερος ἦν Φοίνικος ἀθλιώτερος.

Εὐριπίδης

423ποίας ποθʼ ἁνὴρ λακίδας αἰτεῖται πέπλων;

424ἀλλʼ ἦ Φιλοκτήτου τὰ τοῦ πτωχοῦ λέγεις;

Δικαιόπολις

425οὐκ ἀλλὰ τούτου πολὺ πολὺ πτωχιστέρου.

Εὐριπίδης

426ἀλλʼ ἦ τὰ δυσπινῆ ʼθέλεις πεπλώματα,

427ἃ Βελλεροφόντης εἶχʼ ὁ χωλὸς οὑτοσί;

Δικαιόπολις

428οὐ Βελλεροφόντης· ἀλλὰ κἀκεῖνος μὲν ἦν

429χωλὸς προσαιτῶν στωμύλος δεινὸς λέγειν.

Εὐριπίδης

430οἶδʼ ἄνδρα Μυσὸν Τήλεφον.

Δικαιόπολις

430bναὶ Τήλεφον·

431τούτου δὸς ἀντιβολῶ σέ μοι τὰ σπάργανα.

Εὐριπίδης

432ὦ παῖ δὸς αὐτῷ Τηλέφου ῥακώματα.

433κεῖται δʼ ἄνωθεν τῶν Θυεστείων ῥακῶν

434μεταξὺ τῶν Ἰνοῦς.

Κηφισόφων

434bἰδοὺ ταυτὶ λαβέ.

Δικαιόπολις

435ὦ Ζεῦ διόπτα καὶ κατόπτα πανταχῇ,

436ἐνσκευάσασθαί μʼ οἷον ἀθλιώτατον.

437Εὐριπίδη, ʼπειδήπερ ἐχαρίσω ταδί,

438κἀκεῖνά μοι δὸς τἀκόλουθα τῶν ῥακῶν,

439τὸ πιλίδιον περὶ τὴν κεφαλὴν τὸ Μύσιον.

440δεῖ γάρ με δόξαι πτωχὸν εἶναι τήμερον,

441εἶναι μὲν ὅσπερ εἰμί, φαίνεσθαι δὲ μή·

442τοὺς μὲν θεατὰς εἰδέναι μʼ ὃς εἴμʼ ἐγώ,

443τοὺς δʼ αὖ χορευτὰς ἠλιθίους παρεστάναι,

444ὅπως ἂν αὐτοὺς ῥηματίοις σκιμαλίσω.

Εὐριπίδης

445δώσω· πυκνῇ γὰρ λεπτὰ μηχανᾷ φρενί.

Δικαιόπολις

446εὐδαιμονοίης, Τηλέφῳ δʼ ἁγὼ φρονῶ.

447εὖ γʼ οἷον ἤδη ῥηματίων ἐμπίμπλαμαι.

448ἀτὰρ δέομαί γε πτωχικοῦ βακτηρίου.

Εὐριπίδης

449τουτὶ λαβὼν ἄπελθε λαΐνων σταθμῶν.

Δικαιόπολις

450ὦ θύμʼ, ὁρᾷς γὰρ ὡς ἀπωθοῦμαι δόμων,

451πολλῶν δεόμενος σκευαρίων· νῦν δὴ γενοῦ

452γλίσχρος προσαιτῶν λιπαρῶν τʼ. Εὐριπίδη

453δός μοι σπυρίδιον διακεκαυμένον λύχνῳ.

Εὐριπίδης

454τί δʼ ὦ τάλας σε τοῦδʼ ἔχει πλέκους χρέος;

Δικαιόπολις

455χρέος μὲν οὐδέν, βούλομαι δʼ ὅμως λαβεῖν.

Εὐριπίδης

456λυπηρὸς ἴσθʼ ὢν κἀποχώρησον δόμων.

Δικαιόπολις

457φεῦ·

457aεὐδαιμονοίης, ὥσπερ ἡ μήτηρ ποτέ.

Εὐριπίδης

458ἄπελθε νῦν μοι.

Δικαιόπολις

458bμἀλλά μοι δὸς ἓν μόνον

459κοτυλίσκιον τὸ χεῖλος ἀποκεκρουσμένον.

Εὐριπίδης

460φθείρου λαβὼν τόδʼ· ἴσθʼ ὀχληρὸς ὢν δόμοις.

Δικαιόπολις

461οὔπω μὰ Δίʼ· οἶσθʼ οἷʼ αὐτὸς ἐργάζει κακά.

462ἀλλʼ ὦ γλυκύτατʼ Εὐριπίδη τουτὶ μόνον

463δός μοι χυτρίδιον σφογγίῳ βεβυσμένον.

Εὐριπίδης

464ὦνθρωπʼ ἀφαιρήσει με τὴν τραγῳδίαν·

465ἄπελθε ταυτηνὶ λαβών.

Δικαιόπολις

465bἀπέρχομαι.

466καίτοι τί δράσω; δεῖ γὰρ ἑνὸς οὗ μὴ τυχὼν

467ἀπόλωλʼ. ἄκουσον ὦ γλυκύτατʼ Εὐριπίδη·

468τουτὶ λαβὼν ἄπειμι κοὐ πρόσειμʼ ἔτι·

469ἐς τὸ σπυρίδιον ἰσχνά μοι φυλλεῖα δός.

Εὐριπίδης

470ἀπολεῖς μʼ. ἰδού σοι. φροῦδά μοι τὰ δράματα.

Δικαιόπολις

471ἀλλʼ οὐκέτʼ, ἀλλʼ ἄπειμι. καὶ γάρ εἰμʼ ἄγαν

472ὀχληρός, οὐ δοκῶν με κοιράνους στυγεῖν.

473οἴμοι κακοδαίμων, ὡς ἀπόλωλʼ. ἐπελαθόμην

474ἐν ᾧπέρ ἐστι πάντα μοι τὰ πράγματα.

475Εὐριπίδιον ὦ φιλτάτιον καὶ γλυκύτατον,

476κάκιστʼ ἀπολοίμην, εἴ τί σʼ αἰτήσαιμʼ ἔτι,

477πλὴν ἓν μόνον, τουτὶ μόνον τουτὶ μόνον,

478σκάνδικά μοι δὸς μητρόθεν δεδεγμένος.

Εὐριπίδης

479ἁνὴρ ὑβρίζει· κλῇε πηκτὰ δωμάτων.

Δικαιόπολις

480ὦ θύμʼ ἄνευ σκάνδικος ἐμπορευτέα.

481ἆρʼ οἶσθʼ ὅσον τὸν ἀγῶνʼ ἀγωνιεῖ τάχα,

482μέλλων ὑπὲρ Λακεδαιμονίων ἀνδρῶν λέγειν;

483πρόβαινέ νυν ὦ θυμέ· γραμμὴ δʼ αὑτηί.

484ἕστηκας; οὐκ εἶ καταπιὼν Εὐριπίδην;

485ἐπῄνεσʼ· ἄγε νυν ὦ τάλαινα καρδία

486ἄπελθʼ ἐκεῖσε, κᾆτα τὴν κεφαλὴν ἐκεῖ

487παράσχες εἰποῦσʼ ἅττʼ ἂν αὐτῇ σοι δοκῇ.

488τόλμησον ἴθι χώρησον, ἄγαμαι καρδίας.

Strophe 1

Χορός

490τί δράσεις; τί φήσεις; εὖ ἴσθι νυν

491ἀναίσχυντος ὢν σιδηροῦς τʼ ἀνήρ,

492ὅστις παρασχὼν τῇ πόλει τὸν αὐχένα

493ἅπασι μέλλεις εἷς λέγειν τἀναντία.

494ἁνὴρ οὐ τρέμει τὸ πρᾶγμʼ. εἶά νυν,

495ἐπειδήπερ αὐτὸς αἱρεῖ, λέγε.

Iambics 2

Δικαιόπολις

496μή μοι φθονήσητʼ ἄνδρες οἱ θεώμενοι,

497εἰ πτωχὸς ὢν ἔπειτʼ ἐν Ἀθηναίοις λέγειν

498μέλλω περὶ τῆς πόλεως, τρυγῳδίαν ποιῶν.

500τὸ γὰρ δίκαιον οἶδε καὶ τρυγῳδία.

501ἐγὼ δὲ λέξω δεινὰ μὲν δίκαια δέ.

502οὐ γάρ με νῦν γε διαβαλεῖ Κλέων ὅτι

503ξένων παρόντων τὴν πόλιν κακῶς λέγω.

504αὐτοὶ γάρ ἐσμεν οὑπὶ Ληναίῳ τʼ ἀγών,

505κοὔπω ξένοι πάρεισιν· οὔτε γὰρ φόροι

506ἥκουσιν οὔτʼ ἐκ τῶν πόλεων οἱ ξύμμαχοι·

507ἀλλʼ ἐσμὲν αὐτοὶ νῦν γε περιεπτισμένοι·

508τοὺς γὰρ μετοίκους ἄχυρα τῶν ἀστῶν λέγω.

509ἐγὼ δὲ μισῶ μὲν Λακεδαιμονίους σφόδρα,

510καὐτοῖς ὁ Ποσειδῶν οὑπὶ Ταινάρῳ θεὸς

511σείσας ἅπασιν ἐμβάλοι τὰς οἰκίας·

512κἀμοὶ γάρ ἐστʼ ἀμπέλια διακεκομμένα.

513ἀτὰρ φίλοι γὰρ οἱ παρόντες ἐν λόγῳ,

514τί ταῦτα τοὺς Λάκωνας αἰτιώμεθα;

515ἡμῶν γὰρ ἄνδρες, κοὐχὶ τὴν πόλιν λέγω,

516μέμνησθε τοῦθʼ ὅτι οὐχὶ τὴν πόλιν λέγω,

517ἀλλʼ ἀνδράρια μοχθηρά, παρακεκομμένα,

518ἄτιμα καὶ παράσημα καὶ παράξενα,

519ἐσυκοφάντει Μεγαρέων τὰ χλανίσκια·

520κεἴ που σίκυον ἴδοιεν ἢ λαγῴδιον

521ἢ χοιρίδιον ἢ σκόροδον ἢ χόνδρους ἅλας,

522ταῦτʼ ἦν Μεγαρικὰ κἀπέπρατʼ αὐθημερόν.

523καὶ ταῦτα μὲν δὴ σμικρὰ κἀπιχώρια,

524πόρνην δὲ Σιμαίθαν ἰόντες Μεγαράδε

525νεανίαι κλέπτουσι μεθυσοκότταβοι·

526κᾆθʼ οἱ Μεγαρῆς ὀδύναις πεφυσιγγωμένοι

527ἀντεξέκλεψαν Ἀσπασίας πόρνα δύο·

528κἀντεῦθεν ἀρχὴ τοῦ πολέμου κατερράγη

529Ἕλλησι πᾶσιν ἐκ τριῶν λαικαστριῶν.

530ἐντεῦθεν ὀργῇ Περικλέης οὑλύμπιος

531ἤστραπτʼ ἐβρόντα ξυνεκύκα τὴν Ἑλλάδα,

532ἐτίθει νόμους ὥσπερ σκόλια γεγραμμένους,

533ὡς χρὴ Μεγαρέας μήτε γῇ μήτʼ ἐν ἀγορᾷ

534μήτʼ ἐν θαλάττῃ μήτʼ ἐν οὐρανῷ μένειν.

535ἐντεῦθεν οἱ Μεγαρῆς, ὅτε δὴ ʼπείνων βάδην,

536Λακεδαιμονίων ἐδέοντο τὸ ψήφισμʼ ὅπως

537μεταστραφείη τὸ διὰ τὰς λαικαστρίας·

538κοὐκ ἠθέλομεν ἡμεῖς δεομένων πολλάκις.

539κἀντεῦθεν ἤδη πάταγος ἦν τῶν ἀσπίδων.

540ἐρεῖ τις, οὐ χρῆν· ἀλλὰ τί ἐχρῆν, εἴπατε.

541φέρʼ εἰ Λακεδαιμονίων τις ἐκπλεύσας σκάφει

542ἀπέδοτο φήνας κυνίδιον Σεριφίων,

543καθῆσθʼ ἂν ἐν δόμοισιν; ἦ πολλοῦ γε δεῖ·

544καὶ κάρτα μέντἂν εὐθέως καθείλκετε

545τριακοσίας ναῦς, ἦν δʼ ἂν ἡ πόλις πλέα

546θορύβου στρατιωτῶν, περὶ τριηράρχου βοῆς,

547μισθοῦ διδομένου, παλλαδίων χρυσουμένων,

548στοᾶς στεναχούσης, σιτίων μετρουμένων,

549ἀσκῶν, τροπωτήρων, κάδους ὠνουμένων,

550σκορόδων, ἐλαῶν, κρομμύων ἐν δικτύοις,

551στεφάνων, τριχίδων, αὐλητρίδων, ὑπωπίων·

552τὸ νεώριον δʼ αὖ κωπέων πλατουμένων,

553τύλων ψοφούντων, θαλαμιῶν τροπουμένων,

554αὐλῶν, κελευστῶν, νιγλάρων, συριγμάτων.

555ταῦτʼ οἶδʼ ὅτι ἂν ἐδρᾶτε· τὸν δὲ Τήλεφον

556οὐκ οἰόμεσθα; νοῦς ἄρʼ ἡμῖν οὐκ ἔνι.

Ἡμιχόριον Α

557ἄληθες ὦπίτριπτε καί μιαρώτατε;

558ταυτὶ σὺ τολμᾷς πτωχὸς ὢν ἡμᾶς λέγειν,

559καὶ συκοφάντης εἴ τις ἦν ὠνείδισας;

Ἡμιχόριον Β

560νὴ τὸν Ποσειδῶ καὶ λέγει γʼ ἅπερ λέγει

561δίκαια πάντα κοὐδὲν αὐτῶν ψεύδεται.

Ἡμιχόριον Α

562εἶτʼ εἰ δίκαια, τοῦτον εἰπεῖν αὔτʼ ἐχρῆν;

563ἀλλʼ οὔτι χαίρων ταῦτα τολμήσει λέγειν.

Ἡμιχόριον Β

564οὗτος σὺ ποῖ θεῖς; οὐ μενεῖς; ὡς εἰ θενεῖς

565τὸν ἄνδρα τοῦτον, αὐτὸς ἀρθήσει τάχα.

Strophe 2

Ἡμιχόριον Α

566ἰὼ Λάμαχʼ ὦ βλέπων ἀστραπάς,

567βοήθησον ὦ γοργολόφα φανείς,

568ἰὼ Λάμαχʼ ὦ φίλʼ ὦ φυλέτα·

569εἴτε τις ἔστι ταξίαρχος ἢ στρατηγὸς ἢ

570τειχομάχας ἀνήρ, βοηθησάτω

571τις ἀνύσας. ἐγὼ γὰρ ἔχομαι μέσος.

Λάμαχος

572πόθεν βοῆς ἤκουσα πολεμιστηρίας;

573ποῖ χρὴ βοηθεῖν; ποῖ κυδοιμὸν ἐμβαλεῖν;

574τίς Γοργόνʼ ἐξήγειρεν ἐκ τοῦ σάγματος;

Δικαιόπολις

575ὦ Λάμαχʼ ἥρως, τῶν λόφων καὶ τῶν λόχων.

Ἡμιχόριον Α

575aὦ Λάμαχʼ, οὐ γὰρ οὗτος ἅνθρωπος πάλαι

576ἅπασαν ἡμῶν τὴν πόλιν κακορροθεῖ;

Λάμαχος

577οὗτος σὺ τολμᾷς πτωχὸς ὢν λέγειν τάδε;

Δικαιόπολις

578ὦ Λάμαχʼ ἥρως, ἀλλὰ συγγνώμην ἔχε,

579εἰ πτωχὸς ὢν εἶπόν τι κἀστωμυλάμην.

Λάμαχος

580τί δʼ εἶπας ἡμᾶς; οὐκ ἐρεῖς;

Δικαιόπολις

580bοὐκ οἶδά πω·

581ὑπὸ τοῦ δέους γὰρ τῶν ὅπλων εἰλιγγιῶ.

582ἀλλʼ ἀντιβολῶ σʼ ἀπένεγκέ μου τὴν μορμόνα.

Λάμαχος

583ἰδού.

Δικαιόπολις

583bπαράθες νυν ὑπτίαν αὐτὴν ἐμοί.

Λάμαχος

584κεῖται.

Δικαιόπολις

584bφέρε νυν ἀπὸ τοῦ κράνους μοι τὸ πτερόν.

Λάμαχος

585τουτὶ πτίλον σοι.

Δικαιόπολις

585bτῆς κεφαλῆς νύν μου λαβοῦ,

586ἵνʼ ἐξεμέσω· βδελύττομαι γὰρ τοὺς λόφους.

Λάμαχος

587οὗτος τί δράσεις; τῷ πτίλῳ μέλλεις ἐμεῖν;

588πτίλον γάρ ἐστιν—

Δικαιόπολις

588bεἰπέ μοι τίνος ποτὲ

589ὄρνιθός ἐστιν; ἆρα κομπολακύθου;

Λάμαχος

590οἴμʼ ὡς τεθνήξεις.

Δικαιόπολις

590bμηδαμῶς ὦ Λάμαχε·

591οὐ γὰρ κατʼ ἰσχύν ἐστιν· εἰ δʼ ἰσχυρὸς εἶ,

592τί μʼ οὐκ ἀπεψώλησας; εὔοπλος γὰρ εἶ.

Λάμαχος

593ταυτὶ λέγεις σὺ τὸν στρατηγὸν πτωχὸς ὤν;

Δικαιόπολις

594ἐγὼ γάρ εἰμι πτωχός;

Λάμαχος

594bἀλλὰ τίς γὰρ εἶ;

Δικαιόπολις

595ὅστις; πολίτης χρηστός, οὐ σπουδαρχίδης,

596ἀλλʼ ἐξ ὅτου περ ὁ πόλεμος, στρατωνίδης,

597σὺ δʼ ἐξ ὅτου περ ὁ πόλεμος, μισθαρχίδης.

Λάμαχος

598ἐχειροτόνησαν γάρ με —

Δικαιόπολις

598bκόκκυγές γε τρεῖς.

599ταῦτʼ οὖν ἐγὼ βδελυττόμενος ἐσπεισάμην,

600ὁρῶν πολιοὺς μὲν ἄνδρας ἐν ταῖς τάξεσιν,

601νεανίας δʼ οἵους σὺ διαδεδρακότας,

602τοὺς μὲν ἐπὶ Θρᾴκης μισθοφοροῦντας τρεῖς δραχμάς,

603Τεισαμενοφαινίππους Πανουργιππαρχίδας,

604ἑτέρους δὲ παρὰ Χάρητι τοὺς δʼ ἐν Χάοσιν,

605Γερητοθεοδώρους Διομειαλαζόνας,

606τοὺς δʼ ἐν Καμαρίνῃ κἀν Γέλα κἀν Καταγέλᾳ.

Λάμαχος

607ἐχειροτονήθησαν γάρ.

Δικαιόπολις

607bαἴτιον δὲ τί

608ὑμᾶς μὲν ἀεὶ μισθοφορεῖν ἁμῃγέπῃ,

609τωνδὶ δὲ μηδένʼ; ἐτεὸν ὦ Μαριλάδη

610ἤδη πεπρέσβευκας σὺ πολιὸς ὢν † ἓν ἢ; †

611ἀνένευσε· καίτοι γʼ ἐστὶ σώφρων κἀργάτης.

612τί δαὶ Δράκυλλος ἢ Εὐφορίδης ἢ Πρινίδης;

613εἶδέν τις ὑμῶν τἀκβάτανʼ ἢ τοὺς Χάονας;

614οὔ φασιν. ἀλλʼ ὁ Κοισύρας καὶ Λάμαχος,

615οἷς ὑπʼ ἐράνου τε καὶ χρεῶν πρώην ποτέ,

616ὥσπερ ἀπόνιπτρον ἐκχέοντες ἑσπέρας,

617ἅπαντες ἐξίστω παρῄνουν οἱ φίλοι.

Λάμαχος

618ὦ δημοκρατία ταῦτα δῆτʼ ἀνασχετά;

Δικαιόπολις

619οὐ δῆτʼ ἐὰν μὴ μισθοφορῇ γε Λάμαχος.

Λάμαχος

620ἀλλʼ οὖν ἐγὼ μὲν πᾶσι Πελοποννησίοις

621ἀεὶ πολεμήσω καὶ ταράξω πανταχῇ

622καὶ ναυσὶ καὶ πεζοῖσι κατὰ τὸ καρτερόν.

Δικαιόπολις

623ἐγὼ δὲ κηρύττω γε Πελοποννησίοις

624ἅπασι καὶ Μεγαρεῦσι καὶ Βοιωτίοις

625πωλεῖν ἀγοράζειν πρὸς ἐμέ, Λαμάχῳ δὲ μή.

Prelude 1

Χορός

626ἁνὴρ νικᾷ τοῖσι λόγοισιν, καὶ τὸν δῆμον μεταπείθει

627περὶ τῶν σπονδῶν. ἀλλʼ ἀποδύντες τοῖς ἀναπαίστοις ἐπίωμεν.

Parabasis 2

Χορός

628ἐξ οὗ γε χοροῖσιν ἐφέστηκεν τρυγικοῖς ὁ διδάσκαλος ἡμῶν,

629οὔπω παρέβη πρὸς τὸ θέατρον λέξων ὡς δεξιός ἐστιν·

630διαβαλλόμενος δʼ ὑπὸ τῶν ἐχθρῶν ἐν Ἀθηναίοις ταχυβούλοις,

631ὡς κωμῳδεῖ τὴν πόλιν ἡμῶν καὶ τὸν δῆμον καθυβρίζει,

632ἀποκρίνασθαι δεῖται νυνὶ πρὸς Ἀθηναίους μεταβούλους.

633φησὶν δʼ εἶναι πολλῶν ἀγαθῶν ἄξιος ὑμῖν ὁ ποιητής,

634παύσας ὑμᾶς ξενικοῖσι λόγοις μὴ λίαν ἐξαπατᾶσθαι,

635μήθʼ ἥδεσθαι θωπευομένους, μήτʼ εἶναι χαυνοπολίτας.

636πρότερον δʼ ὑμᾶς ἀπὸ τῶν πόλεων οἱ πρέσβεις ἐξαπατῶντες

637πρῶτον μὲν ἰοστεφάνους ἐκάλουν· κἀπειδὴ τοῦτό τις εἴποι,

638εὐθὺς διὰ τοὺς στεφάνους ἐπʼ ἄκρων τῶν πυγιδίων ἐκάθησθε.

639εἰ δέ τις ὑμᾶς ὑποθωπεύσας λιπαρὰς καλέσειεν Ἀθήνας,

640ηὕρετο πᾶν ἂν διὰ τὰς λιπαράς, ἀφύων τιμὴν περιάψας.

641ταῦτα ποιήσας πολλῶν ἀγαθῶν αἴτιος ὑμῖν γεγένηται,

642καὶ τοὺς δήμους ἐν ταῖς πόλεσιν δείξας ὡς δημοκρατοῦνται.

643τοιγάρτοι νῦν ἐκ τῶν πόλεων τὸν φόρον ὑμῖν ἀπάγοντες

644ἥξουσιν ἰδεῖν ἐπιθυμοῦντες τὸν ποιητὴν τὸν ἄριστον,

645ὅστις παρεκινδύνευσʼ εἰπεῖν ἐν Ἀθηναίοις τὰ δίκαια.

646οὕτω δʼ αὐτοῦ περὶ τῆς τόλμης ἤδη πόρρω κλέος ἥκει,

647ὅτε καὶ βασιλεὺς Λακεδαιμονίων τὴν πρεσβείαν βασανίζων

648ἠρώτησεν πρῶτα μὲν αὐτοὺς πότεροι ταῖς ναυσὶ κρατοῦσιν,

649εἶτα δὲ τοῦτον τὸν ποιητὴν ποτέρους εἴποι κακὰ πολλά·

650τούτους γὰρ ἔφη τοὺς ἀνθρώπους πολὺ βελτίους γεγενῆσθαι

651καὶ τῷ πολέμῳ πολὺ νικήσειν τοῦτον ξύμβουλον ἔχοντας.

652διὰ ταῦθʼ ὑμᾶς Λακεδαιμόνιοι τὴν εἰρήνην προκαλοῦνται

653καὶ τὴν Αἴγιναν ἀπαιτοῦσιν· καὶ τῆς νήσου μὲν ἐκείνης

654οὐ φροντίζουσʼ, ἀλλʼ ἵνα τοῦτον τὸν ποιητὴν ἀφέλωνται.

655ἀλλʼ ὑμεῖς τοι μή ποτʼ ἀφῆσθʼ· ὡς κωμῳδήσει τὰ δίκαια·

656φησὶν δʼ ὑμᾶς πολλὰ διδάξειν ἀγάθʼ, ὥστʼ εὐδαίμονας εἶναι,

657οὐ θωπεύων οὐδʼ ὑποτείνων μισθοὺς οὐδʼ ἐξαπατύλλων,

658οὐδὲ πανουργῶν οὐδὲ κατάρδων, ἀλλὰ τὰ βέλτιστα διδάσκων.

Pnigos 3

Χορός

659πρὸς ταῦτα Κλέων καὶ παλαμάσθω

660καὶ πᾶν ἐπʼ ἐμοὶ τεκταινέσθω.

661τὸ γὰρ εὖ μετʼ ἐμοῦ καὶ τὸ δίκαιον

662ξύμμαχον ἔσται, κοὐ μή ποθʼ ἁλῶ

663περὶ τὴν πόλιν ὢν ὥσπερ ἐκεῖνος

664δειλὸς καὶ λακαταπύγων.

Strophe 4

Χορός

665δεῦρο Μοῦσʼ ἐλθὲ φλεγυρὰ πυρὸς ἔχουσα μένος ἔντονος Ἀχαρνική.

668οἷον ἐξ ἀνθράκων πρινίνων φέψαλος ἀνήλατʼ ἐρεθιζόμενος οὐρίᾳ ῥιπίδι,

670ἡνίκʼ ἂν ἐπανθρακίδες ὦσι παρακείμεναι,

673οἱ δὲ Θασίαν ἀνακυκῶσι λιπαράμπυκα,

674οἱ δὲ μάττωσιν, οὕτω σοβαρὸν ἐλθὲ μέλος ἔντονον ἀγροικότερον

675ὡς ἐμὲ λαβοῦσα τὸν δημότην.

Epirrhema 5

Χορός

676οἱ γέροντες οἱ παλαιοὶ μεμφόμεσθα τῇ πόλει·

677οὐ γὰρ ἀξίως ἐκείνων ὧν ἐναυμαχήσαμεν

678γηροβοσκούμεσθʼ ὑφʼ ὑμῶν, ἀλλὰ δεινὰ πάσχομεν,

679οἵτινες γέροντας ἄνδρας ἐμβαλόντες ἐς γραφὰς

680ὑπὸ νεανίσκων ἐᾶτε καταγελᾶσθαι ῥητόρων,

681οὐδὲν ὄντας, ἀλλὰ κωφοὺς καὶ παρεξηυλημένους,

682οἷς Ποσειδῶν ἀσφάλειός ἐστιν ἡ βακτηρία·

683τονθορύζοντες δὲ γήρᾳ τῷ λίθῳ προσέσταμεν,

684οὐχ ὁρῶντες οὐδὲν εἰ μὴ τῆς δίκης τὴν ἠλύγην.

685ὁ δέ, νεανίας ἑαυτῷ σπουδάσας ξυνηγορεῖν,

686ἐς τάχος παίει ξυνάπτων στρογγύλοις τοῖς ῥήμασιν·

687κᾆτʼ ἀνελκύσας ἐρωτᾷ σκανδάληθρʼ ἱστὰς ἐπῶν

688ἄνδρα Τιθωνὸν σπαράττων καὶ ταράττων καὶ κυκῶν.

689ὁ δʼ ὑπὸ γήρως μασταρύζει, κᾆτʼ ὀφλὼν ἀπέρχεται,

690εἶτα λύζει καὶ δακρύει καὶ λέγει πρὸς τοὺς φίλους,

691οὗ μʼ ἐχρῆν σορὸν πρίασθαι τοῦτʼ ὀφλὼν ἀπέρχομαι.

Antistrophe 6

Χορός

692ταῦτα πῶς εἰκότα, γέροντʼ ἀπολέσαι πολιὸν ἄνδρα περὶ κλεψύδραν,

695πολλὰ δὴ ξυμπονήσαντα καὶ θερμὸν ἀπο-

696μορξάμενον ἀνδρικὸν ἱδρῶτα δὴ καὶ πολύν,

697ἄνδρʼ ἀγαθὸν ὄντα Μαραθῶνι περὶ τὴν πόλιν;

698εἶτα Μαραθῶνι μὲν ὅτʼ ἦμεν ἐδιώκομεν,

700νῦν δʼ ὑπʼ ἀνδρῶν πονηρῶν σφόδρα διωκόμεθα, κᾆτα προσαλισκόμεθα.

702πρὸς τάδε τίς ἀντερεῖ Μαρψίας;

Antepirrhema 7

Χορός

703τῷ γὰρ εἰκὸς ἄνδρα κυφὸν ἡλίκον Θουκυδίδην

704ἐξολέσθαι συμπλακέντα τῇ Σκυθῶν ἐρημίᾳ,

705τῷδε τῷ Κηφισοδήμῳ τῷ λάλῳ ξυνηγόρῳ;

706ὥστʼ ἐγὼ μὲν ἠλέησα κἀπεμορξάμην ἰδὼν

707ἄνδρα πρεσβύτην ὑπʼ ἀνδρὸς τοξότου κυκώμενον,

708ὃς μὰ τὴν Δήμητρʼ, ἐκεῖνος ἡνίκʼ ἦν Θουκυδίδης,

709οὐδʼ ἂν αὐτὴν τὴν Ἀχαίαν ῥᾳδίως ἠνέσχετο,

710ἀλλὰ κατεπάλαισε μέντἂν πρῶτον Εὐάθλους δέκα,

711κατεβόησε δʼ ἂν κεκραγὼς τοξότας τρισχιλίους,

712περιετόξευσεν δʼ ἂν αὐτοῦ τοῦ πατρὸς τοὺς ξυγγενεῖς.

713ἀλλʼ ἐπειδὴ τοὺς γέροντας οὐκ ἐᾶθʼ ὕπνου τυχεῖν,

714ψηφίσασθε χωρὶς εἶναι τὰς γραφάς, ὅπως ἂν ᾖ

715τῷ γέροντι μὲν γέρων καὶ νωδὸς ὁ ξυνήγορος,

716τοῖς νέοισι δʼ εὐρύπρωκτος καὶ λάλος χὠ Κλεινίου.

717κἀξελαύνειν χρὴ τὸ λοιπόν, κἂν φύγῃ τις ζημιοῦν,

718τὸν γέροντα τῷ γέροντι, τὸν νέον δὲ τῷ νέῳ.

Lyric 1

Κόρα

735πεπρᾶσθαι πεπρᾶσθαι.

Μεγαρεύς

736ἐγώνγα καὐτός φαμι. τίς δʼ οὕτως ἄνους

737ὃς ὑμέ κα πρίαιτο φανερὰν ζαμίαν;

738ἀλλʼ ἔστι γάρ μοι Μεγαρικά τις μαχανά,

739χοίρως γὰρ ὑμὲ σκευάσας φασῶ φέρειν.

740περίθεσθε τάσδε τὰς ὁπλὰς τῶν χοιρίων.

741ὅπως δὲ δοξεῖτʼ εἶμεν ἐξ ἀγαθᾶς ὑός·

742ὡς ναὶ τὸν Ἑρμᾶν, αἴπερ ἱξεῖτʼ οἴκαδις

743ἄπρατα, πειρασεῖσθε τᾶς λιμῶ κακῶς.

744ἀλλʼ ἀμφίθεσθε καὶ ταδὶ τὰ ῥυγχία,

745κἤπειτεν ἐς τὸυ σάκκον ὧδʼ ἐσβαίνετε.

746ὅπως δὲ γρυλλιξεῖτε καὶ κοΐξετε

747χἠσεῖτε φωνὰν χοιρίων μυστηρικῶν.

748ἐγὼν δὲ καρυξῶ Δικαιόπολιν ὅπᾳ·

749Δικαιόπολι, ἦ λῇς πρίασθαι χοιρία;

Δικαιόπολις

750τί; ἀνὴρ Μεγαρικός;

Μεγαρεύς

750bἀγορασοῦντες ἵκομες.

Δικαιόπολις

751πῶς ἔχετε;

Μεγαρεύς

751bδιαπεινᾶμες ἀεὶ ποττὸ πῦρ.

Δικαιόπολις

752ἀλλʼ ἡδύ τοι νὴ τὸν Δίʼ, ἢν αὐλὸς παρῇ.

753τί δʼ ἄλλο πράττεθʼ οἱ Μεγαρῆς νῦν;

Μεγαρεύς

753bοἷα δή.

754ὅκα μὲν ἐγὼν τηνῶθεν ἐμπορευόμαν,

755ἄνδρες πρόβουλοι τοῦτʼ ἔπραττον τᾷ πόλει,

756ὅπως τάχιστα καὶ κάκιστʼ ἀπολοίμεθα.

Δικαιόπολις

757αὐτίκʼ ἄρʼ ἀπαλλάξεσθε πραγμάτων.

Μεγαρεύς

757bσά μάν;

Δικαιόπολις

758τί δʼ ἄλλο Μεγαροῖ; πῶς ὁ σῖτος ὤνιος;

Μεγαρεύς

759παρʼ ἁμὶ πολυτίματος ᾇπερ τοὶ θεοί.

Δικαιόπολις

760ἅλας οὖν φέρεις;

Μεγαρεύς

760bοὐχ ὑμὲς αὐτῶν ἄρχετε;

Δικαιόπολις

761οὐδὲ σκόροδα;

Μεγαρεύς

761bποῖα σκόροδʼ; ὑμὲς τῶν ἀεί,

762ὅκκʼ ἐσβάλητε, τὼς ἀρωραῖοι μύες

763πάσσακι τὰς ἄγλιθας ἐξορύσσετε.

Δικαιόπολις

764τί δαὶ φέρεις;

Μεγαρεύς

764bχοίρως ἐγώνγα μυστικάς.

Δικαιόπολις

765καλῶς λέγεις· ἐπίδειξον.

Μεγαρεύς

765bἀλλὰ μὰν καλαί.

766ἄντεινον αἰ λῇς· ὡς παχεῖα καὶ καλά.

Δικαιόπολις

767τουτὶ τί ἦν τὸ πρᾶγμα;

Μεγαρεύς

767bχοῖρος ναὶ Δία.

Δικαιόπολις

768τί λέγεις σύ; ποδαπὴ δή ʼστι χοῖρος;

Μεγαρεύς

768bΜεγαρικά.

769ἢ οὐ χοῖρός ἐσθʼ ἅδʼ;

Δικαιόπολις

769bοὐκ ἔμοιγε φαίνεται.

Μεγαρεύς

770οὐ δεινά; θᾶσθε τῶδε τὰς ἀπιστίας·

771οὔ φατι τάνδε χοῖρον εἶμεν. ἀλλὰ μάν,

772αἰ λῇς, περίδου μοι περὶ θυμιτιδᾶν ἁλῶν,

773αἰ μή ʼστιν οὗτος χοῖρος Ἑλλάνων νόμῳ.

Δικαιόπολις

774ἀλλʼ ἔστιν ἀνθρώπου γε.

Μεγαρεύς

774bναὶ τὸν Διοκλέα

775ἐμά γα. τὺ δέ νιν εἴμεναι τίνος δοκεῖς;

776ἦ λῇς ἀκοῦσαι φθεγγομένας;

Δικαιόπολις

776bνὴ τοὺς θεοὺς

777ἔγωγε.

Μεγαρεύς

777bφώνει δὴ τὺ ταχέως χοιρίον.

778οὐ χρῆσθα; σιγῇς ὦ κάκιστʼ ἀπολουμένα;

779πάλιν τυ ἀποισῶ ναὶ τὸν Ἑρμᾶν οἴκαδις.

Κόρη

780κοῒ κοΐ.

Μεγαρεύς

781αὕτα ʼστὶ χοῖρος;

Δικαιόπολις

781bνῦν γε χοῖρος φαίνεται.

782ἀτὰρ ἐκτραφείς γε κύσθος ἔσται.

Μεγαρεύς

782bπέντʼ ἑτῶν,

783σάφʼ ἴσθι, ποττὰν ματέρʼ εἰκασθήσεται.

Δικαιόπολις

784ἀλλʼ οὐδὲ θύσιμός ἐστιν αὑτηγί.

Μεγαρεύς

784bσά μάν;

785πᾷ δʼ οὐχὶ θύσιμός ἐστι;

Δικαιόπολις

785bκέρκον οὐκ ἔχει.

Μεγαρεύς

786νεαρὰ γάρ ἐστιν· ἀλλὰ δελφακουμένα

787ἑξεῖ μεγάλαν τε καὶ παχεῖαν κἠρυθράν.

788ἀλλʼ αἰ τράφειν λῇς, ἅδε τοι χοῖρος καλά.

Δικαιόπολις

789ὡς ξυγγενὴς ὁ κύσθος αὐτῆς θατέρᾳ.

Μεγαρεύς

790ὁμοματρία γάρ ἐστι κἠκ τωὐτῶ πατρός.

791αἰ δʼ ἂν παχυνθῇ κἀναχνοιανθῇ τριχί,

792κάλλιστος ἔσται χοῖρος Ἀφροδίτᾳ θύειν.

Δικαιόπολις

793ἀλλʼ οὐχὶ χοῖρος τἀφροδίτῃ θύεται.

Μεγαρεύς

794οὐ χοῖρος Ἀφροδίτᾳ; μόνᾳ γα δαιμόνων.

795καὶ γίνεταί γα τᾶνδε τᾶν χοίρων τὸ κρῆς

796ἅδιστον ἂν τὸν ὀδελὸν ἐμπεπαρμένον.

Δικαιόπολις

797ἤδη δʼ ἄνευ τῆς μητρὸς ἐσθίοιεν ἄν;

Μεγαρεύς

798ναὶ τὸν Ποτειδᾶν καί κʼ ἄνις γα τῶ πατρός.

Δικαιόπολις

799τί δʼ ἐσθίει μάλιστα;

Μεγαρεύς

799bπάνθʼ ἅ κα διδῷς.

800αὐτὸς δʼ ἐρώτη.

Δικαιόπολις

800bχοῖρε χοῖρε.

Κόρα

800cκοῒ κοΐ.

Δικαιόπολις

801τρώγοις ἂν ἐρεβίνθους;

Κόρα

801bκοῒ κοῒ κοΐ.

Δικαιόπολις

802τί δαί; φιβάλεως ἰσχάδας;

Κόρα

802bκοῒ κοΐ.

Δικαιόπολις

803τί δαὶ σύ; τρώγοις ἄν;

Κόρα

803bκοῒ κοῒ κοΐ.

Δικαιόπολις

804ὡς ὀξὺ πρὸς τὰς ἰσχάδας κεκράγατε.

805ἐνεγκάτω τις ἔνδοθεν τῶν ἰσχάδων

806τοῖς χοιριδίοισιν. ἆρα τρώξονται; βαβαί,

807οἷον ῥοθιάζουσʼ ὦ πολυτίμηθʼ Ἡράκλεις.

808ποδαπὰ τὰ χοιρίʼ; ὡς Τραγασαῖα φαίνεται.

Μεγαρεύς

809ἀλλʼ οὔτι πάσας κατέτραγον τὰς ἰσχάδας.

810ἐγὼ γὰρ αὐτᾶν τάνδε μίαν ἀνειλόμαν.

Δικαιόπολις

811νὴ τὸν Δίʼ ἀστείω γε τὼ βοσκήματε·

812πόσου πρίωμαί σοι τὰ χοιρίδια; λέγε.

Μεγαρεύς

813τὸ μὲν ἅτερον τούτων σκορόδων τροπαλίδος,

814τὸ δʼ ἅτερον, αἰ λῇς, χοίνικος μόνας ἁλῶν.

Δικαιόπολις

815ὠνήσομαί σοι· περίμενʼ αὐτοῦ.

Μεγαρεύς

815bταῦτα δή.

816Ἑρμᾶ ʼμπολαῖε τὰν γυναῖκα τὰν ἐμὰν

817οὕτω μʼ ἀποδόσθαι τάν τʼ ἐμωυτῶ τʼ ἐμωυτῶ ματέρα.

Συκοφάντης

818ὦνθρωπε ποδαπός;

Μεγαρεύς

818bχοιροπώλας Μεγαρικός.

Συκοφάντης

819τὰ χοιρίδια τοίνυν ἐγὼ φανῶ ταδὶ

820πολέμια καὶ σέ.

Μεγαρεύς

820bτοῦτʼ ἐκεῖνʼ, ἵκει πάλιν

821ὅθενπερ ἀρχὰ τῶν κακῶν ἁμῖν ἔφυ.

Συκοφάντης

822κλάων μεγαριεῖς. οὐκ ἀφήσεις τὸν σάκον;

Μεγαρεύς

823Δικαιόπολι Δικαιόπολι φαντάδδομαι.

Δικαιόπολις

824ὑπὸ τοῦ; τίς ὁ φαίνων σʼ ἐστίν; ἁγορανόμοι,

825τοὺς συκοφάντας οὐ θύραζʼ ἐξείρξετε;

826τί δὴ μαθὼν φαίνεις ἄνευ θρυαλλίδος;

Συκοφάντης

827οὐ γὰρ φανῶ τοὺς πολεμίους;

Δικαιόπολις

827bκλάων γε σύ,

828εἰ μὴ ʼτέρωσε συκοφαντήσεις τρέχων.

Μεγαρεύς

829οἷον τὸ κακὸν ἐν ταῖς Ἀθάναις τοῦτʼ ἔνι.

Δικαιόπολις

830θάρρει Μεγαρίκʼ· ἀλλʼ ἧς τὰ χοιρίδιʼ ἀπέδου

831τιμῆς, λαβὲ ταυτὶ τὰ σκόροδα καὶ τοὺς ἅλας,

832καὶ χαῖρε πόλλʼ.

Μεγαρεύς

832bἀλλʼ ἁμὶν οὐκ ἐπιχώριον.

Δικαιόπολις

833πολυπραγμοσύνη νυν ἐς κεφαλὴν τράποιτʼ ἐμοί.

Μεγαρεύς

834ὦ χοιρίδια πειρῆσθε κἄνις τῶ πατρὸς

835παίειν ἐφʼ ἁλὶ τὰν μᾶδδαν, αἴκα τις διδῷ.

Strophe 1

Χορός

836εὐδαιμονεῖ γʼ ἅνθρωπος. οὐκ ἤκουσας οἷ προβαίνει

837τὸ πρᾶγμα τοῦ βουλεύματος; καρπώσεται γὰρ ἁνὴρ

838ἐν τἀγορᾷ καθήμενος·

839κἂν εἰσίῃ τις Κτησίας

840ἢ συκοφάντης ἄλλος, οἰμώζων

841καθεδεῖται·

Strophe 2

Χορός

842οὐδʼ ἄλλος ἀνθρώπων ὑποψωνῶν σε πημανεῖ τι,

843οὐδʼ ἐξομόρξεται Πρέπις τὴν εὐρυπρωκτίαν σοι,

844οὐδʼ ὠστιεῖ Κλεωνύμῳ·

845χλαῖναν δʼ ἔχων φανὴν δίει

846κοὐ ξυντυχών σʼ Ὑπέρβολος

847δικῶν ἀναπλήσει·

Strophe 3

Χορός

848οὐδʼ ἐντυχὼν ἐν τἀγορᾷ πρόσεισί σοι βαδίζων

849Κρατῖνος ἀεὶ κεκαρμένος μοιχὸν μιᾷ μαχαίρᾳ,

850ὁ περιπόνηρος Ἀρτέμων,

851ὁ ταχὺς ἄγαν τὴν μουσικήν,

852ὄζων κακὸν τῶν μασχαλῶν

853πατρ…