Εὐμενίδες

Anapests 1

Χορός

307ἄγε δὴ καὶ χορὸν ἅψωμεν, ἐπεὶ

308μοῦσαν στυγερὰν

309ἀποφαίνεσθαι δεδόκηκεν,

310λέξαι τε λάχη τὰ κατʼ ἀνθρώπους

311ὡς ἐπινωμᾷ στάσις ἁμά.

312εὐθυδίκαιοι δʼ οἰόμεθʼ εἶναι·

313τὸν μὲν καθαρὰς χεῖρας προνέμοντʼ

314οὔτις ἐφέρπει μῆνις ἀφʼ ἡμῶν,

315ἀσινὴς δʼ αἰῶνα διοιχνεῖ·

316ὅστις δʼ ἀλιτὼν ὥσπερ ὅδʼ ἁνὴρ

317χεῖρας φονίας ἐπικρύπτει,

318μάρτυρες ὀρθαὶ τοῖσι θανοῦσιν

319παραγιγνόμεναι πράκτορες αἵματος

320αὐτῷ τελέως ἐφάνημεν.

Strophe 1

Χορός

321μᾶτερ ἅ μʼ ἔτικτες, ὦ μᾶτερ

322Νύξ, ἀλαοῖσι καὶ δεδορκόσιν

323ποινάν, κλῦθʼ. ὁ Λατοῦς γὰρ ἶ-

324νίς μʼ ἄτιμον τίθησιν

325τόνδʼ ἀφαιρούμενος

326πτῶκα, ματρῷον ἅ-

327γνισμα κύριον φόνου.

Ephymn 1

Χορός

328ἐπὶ δὲ τῷ τεθυμένῳ

329τόδε μέλος, παρακοπά,

330παραφορὰ φρενοδαλής,

331ὕμνος ἐξ Ἐρινύων,

332δέσμιος φρενῶν, ἀφόρ-

333μικτος, αὐονὰ βροτοῖς.

Antistrophe 1

Χορός

334τοῦτο γὰρ λάχος διανταία

335Μοῖρʼ ἐπέκλωσεν ἐμπέδως ἔχειν,

336θνατῶν τοῖσιν αὐτουργίαι

337ξυμπέσωσιν μάταιοι,

338τοῖς ὁμαρτεῖν, ὄφρʼ ἂν

339γᾶν ὑπέλθῃ· θανὼν δʼ

340οὐκ ἄγαν ἐλεύθερος.

Ephymn 1

Χορός

341ἐπὶ δὲ τῷ τεθυμένῳ

342τόδε μέλος, παρακοπά,

343παραφορὰ φρενοδαλής,

344ὕμνος ἐξ Ἐρινύων,

345δέσμιος φρενῶν, ἀφόρ-

346μικτος, αὐονὰ βροτοῖς.

Strophe 2

Χορός

349γιγνομέναισι λάχη τάδʼ ἐφʼ ἁμὶν ἐκράνθη·

350ἀθανάτων δʼ ἀπέχειν χέρας, οὐδέ τις ἐστί

351συνδαίτωρ μετάκοινος·

352παλλεύκων δὲ πέπλων ἀπόμοιρος ἄκληρος ἐτύχθην

353¯˘¯˘¯˘¯

Ephymn 2

Χορός

354δωμάτων γὰρ εἱλόμαν

355ἀνατροπάς, ὅταν Ἄρης

356τιθασὸς ὢν φίλον ἕλῃ.

357ἐπὶ τὸν ὧδʼ ἱέμεναι

358κρατερὸν ὄνθʼ ὅμως ἀμαυ-

359ροῦμεν ὑφʼ αἵματος νέου.

Antistrophe 2

Χορός

360σπεύδομεν αἵδʼ ἀφελεῖν τινὰ τάσδε μερίμνας,

361θεῶν δʼ ἀτέλειαν ἐμαῖς μελέταις ἐπικραίνειν,

362μηδʼ εἰς ἄγκρισιν ἐλθεῖν·

365Ζεὺς δʼ αἱμοσταγὲς ἀξιόμισον ἔθνος τόδε λέσχας

367ἇς ἀπηξιώσατο.

Ephymn 2

Χορός

354aδωμάτων γὰρ εἱλόμαν

355aἀνατροπάς, ὅταν Ἄρης

356aτιθασὸς ὢν φίλον ἕλῃ.

357aἐπὶ τὸν ὧδʼ ἱέμεναι

358aκρατερὸν ὄνθʼ ὅμως ἀμαυ-

359aροῦμεν ὑφʼ αἵματος νέου.

Strophe 3

Χορός

368δόξαι τʼ ἀνδρῶν καὶ μάλʼ ὑπʼ αἰθέρι σεμναὶ

369τακόμεναι κατὰ γᾶν μινύθουσιν ἄτιμοι

370ἁμετέραις ἐφόδοις μελανείμοσιν, ὀρχη-

371σμοῖς τʼ ἐπιφθόνοις ποδός.

Ephymn 3

Χορός

372μάλα γὰρ οὖν ἁλομένα

373ἀνέκαθεν βαρυπεσῆ

374καταφέρω ποδὸς ἀκμάν,

375σφαλερὰ καὶ τανυδρόμοις

376κῶλα, δύσφορον ἄταν.

Antistrophe 3

Χορός

377πίπτων δʼ οὐκ οἶδεν τόδʼ ὑπʼ ἄφρονι λύμᾳ·

378τοῖον γὰρ ἐπὶ κνέφας ἀνδρὶ μύσος πεπόταται,

379καὶ δνοφεράν τινʼ ἀχλὺν κατὰ δώματος αὐδᾶ-

380ται πολύστονος φάτις.

Ephymn 3

Χορός

372aμάλα γὰρ οὖν ἁλομένα

373aἀνέκαθεν βαρυπεσῆ

374aκαταφέρω ποδὸς ἀκμάν,

375aσφαλερὰ καὶ τανυδρόμοις

376aκῶλα, δύσφορον ἄταν.

Strophe 4

Χορός

381μένει γάρ. εὐμήχανοί

382τε καὶ τέλειοι, κακῶν

383τε μνήμονες σεμναὶ

384καὶ δυσπαρήγοροι βροτοῖς,

385ἄτιμʼ ἀτίετα διόμεναι

386λάχη θεῶν διχοστατοῦντʼ ἀνηλίῳ

387λάμπᾳ, δυσοδοπαίπαλα

388δερκομένοισι καὶ δυσομμάτοις ὁμῶς.

Antistrophe 4

Χορός

389τίς οὖν τάδʼ οὐχ ἅζεταί

390τε καὶ δέδοικεν βροτῶν,

391ἐμοῦ κλύων θεσμὸν

392τὸν μοιρόκραντον ἐκ θεῶν

393δοθέντα τέλεον; ἔτι δέ μοι

394μένει γέρας παλαιόν, οὐδʼ ἀτιμίας

395κύρω, καίπερ ὑπὸ χθόνα

396τάξιν ἔχουσα καὶ δυσήλιον κνέφας.