Ἀγαμέμνων

Strophe 1

Χορός

1448φεῦ, τίς ἂν ἐν τάχει, μὴ περιώδυνος,

1449μηδὲ δεμνιοτήρης,

1450μόλοι τὸν αἰεὶ φέρουσʼ ἐν ἡμῖν

1451Μοῖρʼ ἀτέλευτον ὕπνον, δαμέντος

1452φύλακος εὐμενεστάτου καὶ

1453πολλὰ τλάντος γυναικὸς διαί·

1454πρὸς γυναικὸς δʼ ἀπέφθισεν βίον.

Ephymn. 1

Χορός

1455ἰὼ ἰὼ παράνους Ἑλένα

1456μία τὰς πολλάς, τάς πάνυ πολλὰς

1457ψυχὰς ὀλέσασʼ ὑπὸ Τροίᾳ.

1458νῦν δὲ τελέαν πολύμναστον ἐπηνθίσω

1460διʼ αἷμʼ ἄνιπτον. ἦ τις ἦν τότʼ ἐν δόμοις

1461ἔρις ἐρίδματος ἀνδρὸς οἰζύς.

Anapests 3

Κλυταιμήστρα

1462μηδὲν θανάτου μοῖραν ἐπεύχου

1463τοῖσδε βαρυνθείς·

1464μηδʼ εἰς Ἑλένην κότον ἐκτρέψῃς,

1465ὡς ἀνδρολέτειρʼ, ὡς μία πολλῶν

1466ἀνδρῶν ψυχὰς Δαναῶν ὀλέσασʼ

1467ἀξύστατον ἄλγος ἔπραξεν.

Antistrophe 1

Χορός

1468δαῖμον, ὃς ἐμπίτνεις δώμασι καὶ διφυί-

1469οισι Τανταλίδαισιν,

1470κράτος τʼ ἰσόψυχον ἐκ γυναικῶν

1471καρδιόδηκτον ἐμοὶ κρατύνεις.

1472ἐπὶ δὲ σώματος δίκαν μοι

1473κόρακος ἐχθροῦ σταθεῖσʼ ἐκνόμως

1474ὕμνον ὑμνεῖν ἐπεύχεται ˘¯

Anapests 5

Κλυταιμήστρα

1475νῦν δʼ ὤρθωσας στόματος γνώμην,

1476τὸν τριπάχυντον

1477δαίμονα γέννης τῆσδε κικλήσκων.

1478ἐκ τοῦ γὰρ ἔρως αἱματολοιχὸς

1479νείρᾳ τρέφεται, πρὶν καταλῆξαι

1480τὸ παλαιὸν ἄχος, νέος ἰχώρ.

Strophe 2

Χορός

1481ἦ μέγαν οἰκονόμον

1482δαίμονα καὶ βαρύμηνιν αἰνεῖς,

1483φεῦ φεῦ, κακὸν αἶνον ἀτη-

1484ρᾶς τύχας ἀκορέστου·

1485ἰὴ ἰή, διαὶ Διὸς

1486παναιτίου πανεργέτα·

1487τί γὰρ βροτοῖς ἄνευ Διὸς τελεῖται;

1488τί τῶνδʼ οὐ θεόκραντόν ἐστιν;

Ephymn. 2

Χορός

1489ἰὼ ἰὼ βασιλεῦ βασιλεῦ,

1490πῶς σε δακρύσω;

1491φρενὸς ἐκ φιλίας τί ποτʼ εἴπω;

1492κεῖσαι δʼ ἀράχνης ἐν ὑφάσματι τῷδʼ

1493ἀσεβεῖ θανάτῳ βίον ἐκπνέων.

1494ὤμοι μοι κοίταν τάνδʼ ἀνελεύθερον

1495δολίῳ μόρῳ δαμεὶς δάμαρτος

1496ἐκ χερὸς ἀμφιτόμῳ βελέμνῳ.

Anapests 8

Κλυταιμήστρα

1497αὐχεῖς εἶναι τόδε τοὔργον ἐμόν;

1498μηδʼ ἐπιλεχθῇς

1499Ἀγαμεμνονίαν εἶναί μʼ ἄλοχον.

1500φανταζόμενος δὲ γυναικὶ νεκροῦ

1501τοῦδʼ ὁ παλαιὸς δριμὺς ἀλάστωρ

1502Ἀτρέως χαλεποῦ θοινατῆρος

1503τόνδʼ ἀπέτεισεν,

1504τέλεον νεαροῖς ἐπιθύσας.

Antistrophe 2

Χορός

1505ὡς μὲν ἀναίτιος εἶ

1506τοῦδε φόνου τίς ὁ μαρτυρήσων;

1507πῶς πῶς; πατρόθεν δὲ συλλή-

1508πτωρ γένοιτʼ ἂν ἀλάστωρ.

1509βιάζεται δʼ ὁμοσπόροις

1510ἐπιρροαῖσιν αἱμάτων

1511μέλας Ἄρης, ὅποι δίκαν προβαίνων

1512πάχνᾳ κουροβόρῳ παρέξει.

Ephymn 2

Χορός

1513ἰὼ ἰὼ βασιλεῦ βασιλεῦ,

1514πῶς σε δακρύσω;

1515φρενὸς ἐκ φιλίας τί ποτʼ εἴπω;

1516κεῖσαι δʼ ἀράχνης ἐν ὑφάσματι τῷδʼ

1517ἀσεβεῖ θανάτῳ βίον ἐκπνέων.

1518ὤμοι μοι κοίταν τάνδʼ ἀνελεύθερον

1519δολίῳ μόρῳ δαμεὶς

1520ἐκ χερὸς ἀμφιτόμῳ βελέμνῳ.

Anapests 11

Κλυταιμήστρα

1521οὔτʼ ἀνελεύθερον οἶμαι θάνατον

1522τῷδε γενέσθαι.

1523οὐδὲ γὰρ οὗτος δολίαν ἄτην

1524οἴκοισιν ἔθηκʼ;

1525ἀλλʼ ἐμὸν ἐκ τοῦδʼ ἔρνος ἀερθέν.

1526τὴν πολυκλαύτην Ἰφιγενείαν,

1527ἄξια δράσας ἄξια πάσχων

1528μηδὲν ἐν Ἅιδου μεγαλαυχείτω,

1529ξιφοδηλήτῳ,

1529bθανάτῳ τείσας ἅπερ ἦρξεν.

Strophe 3

Χορός

1530ἀμηχανῶ φροντίδος στερηθεὶς

1531εὐπάλαμον μέριμναν

1532ὅπα τράπωμαι, πίτνοντος οἴκου.

1533δέδοικα δʼ ὄμβρου κτύπον δομοσφαλῆ

1534τὸν αἱματηρόν· ψακὰς δὲ λήγει.

1535δίκην δʼ ἐπʼ ἄλλο πρᾶγμα θηγάνει βλάβης

1536πρὸς ἄλλαις θηγάναισι μοῖρα.

Ephymn 3

Χορός

1537ἰὼ γᾶ γᾶ, εἴθʼ ἔμʼ ἐδέξω,

1538πρὶν τόνδʼ ἐπιδεῖν ἀργυροτοίχου

1540δροίτης κατέχοντα χάμευναν.

1541τίς ὁ θάψων νιν; τίς ὁ θρηνήσων;

1542ἦ σὺ τόδʼ ἔρξαι τλήσῃ, κτείνασʼ

1543ἄνδρα τὸν αὑτῆς ἀποκωκῦσαι

1545ψυχῇ τʼ ἄχαριν χάριν ἀντʼ ἔργων

1546μεγάλων ἀδίκως ἐπικρᾶναι;

1547τίς δʼ ἐπιτύμβιον αἶνον ἐπʼ ἀνδρὶ θείῳ

1548σὺν δακρύοις ἰάπτων

1550ἀληθείᾳ φρενῶν πονήσει;

Anapests 14

Κλυταιμήστρα

1551οὐ σὲ προσήκει τὸ μέλημʼ ἀλέγειν

1552τοῦτο· πρὸς ἡμῶν

1553κάππεσε, κάτθανε, καὶ καταθάψομεν,

1554οὐχ ὑπὸ κλαυθμῶν τῶν ἐξ οἴκων,

1555ἀλλʼ Ἰφιγένειά νιν ἀσπασίως

1556θυγάτηρ, ὡς χρή,

1557πατέρʼ ἀντιάσασα πρὸς ὠκύπορον

1558πόρθμευμʼ ἀχέων

1559περὶ χεῖρε βαλοῦσα φιλήσει.

Antistrophe 3

Χορός

1560ὄνειδος ἥκει τόδʼ ἀντʼ ὀνείδους.

1561δύσμαχα δʼ ἔστι κρῖναι.

1562φέρει φέροντʼ, ἐκτίνει δʼ ὁ καίνων.

1563μίμνει δὲ μίμνοντος ἐν θρόνῳ Διὸς

1564παθεῖν τὸν ἔρξαντα· θέσμιον γάρ.

1565τίς ἂν γονὰν ἀραῖον ἐκβάλοι δόμων;

1566κεκόλληται γένος πρὸς ἄτᾳ.

Anapests 16

Κλυταιμήστρα

1567ἐς τόνδʼ ἐνέβης ξὺν ἀληθείᾳ

1568χρησμόν. ἐγὼ δʼ οὖν

1569ἐθέλω δαίμονι τῷ Πλεισθενιδῶν

1570ὅρκους θεμένη τάδε μὲν στέργειν,

1571δύστλητά περ ὄνθʼ· ὃ δὲ λοιπόν, ἰόντʼ

1572ἐκ τῶνδε δόμων ἄλλην γενεὰν

1573τρίβειν θανάτοις αὐθένταισι.

1574κτεάνων τε μέρος

1575aβαιὸν ἐχούσῃ πᾶν ἀπόχρη μοι

1575bμανίας μελάθρων

1576ἀλληλοφόνους ἀφελούσῃ.